2024 წლის 20 ივნისს, ქორთიარდ მარიოტი თბილისში, ბიოლოგიურ მეურნეობათა ასოციაცია „ელკანას“ და შვეიცარიული ორგანიზაცია ჰექს-ეპერის სამხრეთ კავკასიის ოფისის ორგანიზებით გაიმართა კონფერენცია -  „საქართველოს მცირე ფერმერთა ჯგუფების მიერ წარმოებული ორგანული და ფეართრეიდ თხილის საბაზრო შესაძლებლობები“. კონფერენცია „ელკანას“ დირექტორმა მარიამ ჯორჯაძემ და ჰექს-ეპერის სამხრეთ კავკასიის ოფისის რეგიონულმა დირექტორმა ბექა ურუშაძემ გახსნეს. აზიის პროგრამის ხელმძღვანელმა, მარ ზოსმა დისტანციურად მიმართა კონფერენციის მონაწილეებს.

კონფერენცია წარმოადგენდა შვეიცარიული ორგანიზაცია ჰექს-ეპერისა (HEKS-EPER) და დანიის განვითარების სააგენტო დანიდას (DANIDA) მიერ დაფინანსებული პროექტის -  „ორგანული თხილის წარმოების ჯაჭვის განვითარება დამატებითი შემოსავლებისა და ღირსეული დასაქმებისათვის დასავლეთ საქართველოში" შემაჯამებელ ღონისძიებას. კონფერენციაზე დამსწრე საზოგადოებას საკუთარი გამოცდილება გაუზიარეს როგორც ადგილობრივმა, ისე საერთაშორისო ექსპერტებმა:

• პროექტის შედეგებისა და მის ფარგლებში დაარსებული EU Organic და Fairtrade სერტიფიცირებული ბიოთხილის მწარმოებელთა ასოციაცია „კავკასნათის“ მიღწევებისა და პერსპექტივების შესახებ მოხსენებები წარმოადგინეს ასოციაცია „ელკანას“, ასოციაცია „კავკასნათისა’ და პროექტის კომერციული პარტნიორის - შპს „პაკკა ჯორჯიას“ წარმომადგენლებმა;
• მცირე ფერმერთა ორგანული და Fairtrade სერტიფიცირების გამოწვევებისა და პერსპექტივების, მცირე ფერმერთა ფინანსური მხარდაჭერის სქემებისა და ადგილობრივი და საერთაშორისო ბაზრის შესაძლებლობების შესახებ მოხსენებები გააკეთეს საკონსულტაციო „სთიმსქეილის“, სერტიფიცირების ორგანო შპს „კავკასსერტის“ და შვეიცარიის Fairtrade ორგანიზაციის - „მაქს ჰაველარისა“  და შვეიცარიული კომპანია „გებანას“ წარმომადგენლებმა;
• ორგანული თხილის წარმოების გამოწვევების განხილვას დაეთმო კონფერენციის ბოლო ნაწილი, სადაც აგრონომებისა და ბიოსაშუალებების შემომტანი/მწარმოებელი კომპანიების მონაწილეობით ცოცხალი დისკუსია გაიმართა.

კონფერენციას ესწრებოდა სამოცზე მეტი მონაწილე - საერთაშორისო, სამოქალაქო და სამეცნიერო ორგანიზაციის წარმომადგენლები. ორგანული მეურნეობები, ბიო საშუალებების მწარმოებელი კომპანიები და სხვა დაინტერესებული პირები.

კონფერენციის პარალელურად გაიმართა ბიო საშუალებების გამოფენა.