ბიოლოგიურ მეურნეობათა ასოციაცია „ელკანას“ წევრი შეიძლება გახდეს სრულწლოვანი ფიზიკური ან იურიდიული პირი (მეურნეობა, საწარმო, სოფლის ტურიზმის ობიექტი), რომელიც იზიარებს ასოციაციის მისიას და მზადაა გადავიდეს ბიო/აგროეკოლოგიურ წარმოებაზე ან სურს, მხარი დაუჭიროს ასოციაციის მიზნების მიღწევას/საქმიანობას.

„ელკანას“ წევრი შეიძლება იყოს:

• ასოცირებული წევრი;
• ნამდვილი წევრი.

ასოციაციაში წევრად მიღების, წევრობის შეწყვეტისა და წევრის სტატუსის განსაზღვრის საკითხს წყვეტს ასოციაციის გამგეობა

• „ელკანას“ ასოცირებული წევრი, გაწევრიანებიდან მინიმუმ 1 წლის შემდეგ, თუ იგი:

ა) ფლობს ბიოსერტიფიკატს და/ან „ელკანას“ ხარისხის ნიშანს;

ბ) თუ ასოცირებული წევრობისას დადგენილი წესით იხდიდა საწევრო გადასახადს; 

• ასოციაციის იდეური მხარდამჭერი ფიზიკური პირი, რომელიც გაწევრიანებამდე მინიმუმ 1 წელი ჩართულია ასოციაციის საქმიანობაში, როგორც დასაქმებული, მოხალისე ან მხარდამჭერი.

ასოციაციის ნამდვილი წევრი მონაწილეობს ასოციაციის მართვაში, კერძოდ, ასოციაციის წესდებით გათვალისწინებული წესით, მას შეუძლია:

• თანასწორი უფლებით მონაწილეობდეს ასოციაციის ნამდვილ წევრთა საერთო კრების მუშაობაში;
• პირადად ან სხვა ნამდვილ წევრებთან ერთად მოითხოვოს რიგგარეშე საერთო კრების მოწვევა ან მორიგი საერთო კრების დღის წესრიგში დამატებების შეტანა;
• დაასახელოს საკუთარი თავი ან სხვა პირი ასოციაციის გამგეობის წევრობის კანდიდატად.

ასოციაცია „ელკანას“ წევრი ვალდებულია:

• ყოველი კალენდარული წლის 1 მარტამდე დაფაროს ასოციაციის გამგეობის მიერ დადგენილი საწევრო გადასახადი;
• იზიარებდეს ასოციაციის მისიას, დაიცვას ასოციაციის წესდების მოთხოვნები და გაუფრთხილდეს მის რეპუტაციას;
• მეურნეობის წარმოებისას დაიცვას ბიო/აგროეკოლოგიური წარმოების პრინციპები;
• ნამდვილი წევრის შემთხვევაში შეინარჩუნოს მეურნეობის ბიოსტატუსი და/ან „ელკანას“ ხარისხის ნიშანი;
• აცნობოს ასოციაციის ადმინისტრაციას მისი საკონტაქტო ინფორმაციის (ტელეფონი, ელ. ფოსტა, ფაქტობრივი და/ან მეურნეობის/საწარმოს/ტურისტული ობიექტის მისამართი) ან ძირითადი მრჩევლის  ცვლილების შესახებ.

წევრობის მსურველ პირს შეუძლია „ელკანას“ ოფისში უფასოდ გაიაროს წინასწარი კონსულტაცია, სადაც მას აუხსნიან მისი მეურნეობის/საწარმოს/ტურიზმის ობიექტის აგროეკოლოგიის პრინციპებზე გადასვლასთან დაკავშირებულ გამოწვევებსა და შესაძლებლობებს და მიაწვდიან ზოგად ინფორმაციას:

• ორგანული წარმოების / აგროეკოლოგიის / აგროტურიზმის პრინციპების შესახებ;
• ასოციაციის წევრთა კატეგორიების, უფლება-მოვალეობების, გაწევრიანების პროცედურის, მომსახურების პაკეტებისა და საწევრო გადასახადის შესახებ.

მეურნეობის/წარმოების/ტურისტული ობიექტის მფლობელის ასოციაციის წევრობის შესახებ განცხადებას იბარებს ის მრჩეველი, რომელიც შემდგომში განისაზღვრება, როგორც წევრის პირველად/ყოველწლიურ ვიზიტზე და მომსახურების მიწოდებაზე პასუხისმგებელი (ძირითადი) დარგობრივი მრჩეველი. განცხადებას თან უნდა ერთოდეს:

• სამოტივაციო წერილი;
• ასოციაციის დარგობრივი კონსულტანტის რეკომენდაცია;
• პირადობის მოწმობის ასლი (ფიზიკური პირის შემთხვევაში) ან ამონაწერი საჯარო რეესტრიდან (იურიდიული პირის შემთხვევაში).

ასოციაციის წევრის უფლებამოსილება იწყება იმ დღიდან, როცა  წევრობის მსურველის განცხადებას გამგეობა დაამტკიცებს. თუმცა მას ასოციაციაში განცხადების შემოტანისა და საწევრო გადასახადის გადახდის დღიდან აქვს უფლება მიიღოს წევრისათვის გათვალისწინებული მომსახურება.

ასოციაციის ნამდვილი წევრობის მსურველი, რომელიც აკმაყოფილებს შესაბამის კრიტერიუმებს, კალენდარული წლის 1 იანვრიდან მარტის ბოლომდე ასოციაციის ადმინისტრაციას წარუდგენს:

• განცხადებას და სამოტივაციო წერილს გამგეობის სახელზე ნამდვილ წევრად მიღების შესახებ;
• ასოციაციის ერთი მოქმედი ნამდვილი წევრის რეკომენდაციას;
• მისი მეურნეობის/წარმოების ბიოსერტიფიკატს და/ან „ელკანას“ ხარისხის ნიშანს;
• შესაბამისი საწევრო გადასახადის გადახდის დამადასტურებელ დოკუმენტს.

„ელკანას“ საწევრო გადასახადი შეადგენს 100 (ასი) ლარს წელიწადში, ხოლო იმ ნამდვილი წევრების საწევრო გადასახადი, რომლებიც „იდეურ მხარდამჭერებს“ წარმოადგენენ, შეადგენს 200 (ორასი) ლარს წელიწადში.

ამასთან, წევრები, რომლებიც ფლობენ „ელკანას“ ხარისხის ნიშანს, ყოველწლიურად, საწევრო გადასახადთან ერთად იხდიან ხარისხის ნიშნის მინიჭების საფასურს - 80 (ოთხმოცი) ლარს.

საწევრო გადასახადისაგან თავისუფლდებიან ოკუპირებული ტერიტორიების მიმდებარე სოფლების მაცხოვრებლები.

საწევრო გადასახადი უნდა დაიფაროს ყოველი წლის მარტის ბოლომდე (2025 წელს, საგამონაკლისო წესით, აპრილის ბოლომდე), ასოციაციის შესაბამის საბანკო ანგარიშზე თანხის შეტანით/გადარიცხვით ან ასოციაციის ცენტრალურ ოფისში ნაღდი ანგარიშსწორებით, სალაროს შემოსავლის ორდერის გაფორმებით.

საწევროს გადახდა ხდება შემდეგ საბანკო ანგარიშზე:

მიმღები ბანკი: სს „თიბისი ბანკი“

ბანკის კოდი: TBCBGE22

მიმღების ანგარიში: GE84TB7392636080100001

მიმღების სახელი: ბიოლოგიურ მეურნეობათა ასოციაცია „ელკანა“

დანიშნულება: ---------------------- /თქვენი სახელი, გვარი/ 202- წლის საწევრო გადასახადი

პირველ საწევრო გადასახადს წევრობის კანდიდატი იხდის გაწევრიანების შესახებ განცხადების წარდგენის პარალელურად. ამ დროს მოქმედებს შემდეგი საგამონაკლისო წესი:

• იანვარი-სექტემბრის პერიოდში გაწევრიანების შემთხვევაში, გაწევრიანებისას გადახდილი საწევრო გადასახადი იფარება მთლიანად, ხოლო მომდევნო წლის საწევრო გადასახადი იფარება მომდევნო წლის იანვრიდან, საერთო წესით;
• ოქტომბრიდან დეკემბრის ჩათვლით გაწევრიანების შემთხვევაში, წევრობის კანდიდატი გაწევრიანებისას იხდის მხოლოდ მომდევნო წლის საწევრო გადასახადს, ხოლო მიმდინარე კალენდარული წლის მაქსიმუმ სამი თვის განმავლობაში იგი უფასოდ სარგებლობს ასოციაციის მომსახურებით.

იმ წევრს, რომელიც არ გადაიხდის კუთვნილ საწევრო გადასახადს ყოველი კალენდარული წლის მარტის ბოლომდე, ავტომატურად უჩერდება წევრობა და მომსახურების პაკეტით გათვალისწინებული სერვისების მიწოდება.

თუ წევრმა მაისის ბოლომდეც არ დაფარა საწევრო დავალიანება, საწევრო გადასახადის დაფარვით წევრობის და, შესაბამისად, მომსახურების აღდგენა შესაძლებელია იქნება: ა) 1 ივლისიდან, მიმდინარე წლის საწევრო გადასახადის სრულად გადახდით; ბ) მომდევნო კალენდარული წლის იანვრიდან, ზემოთ აღწერილი საერთო წესით, წლიური საწევრო გადასახადის დაფარვით.

ზედიზედ ორი წლის განმავლობაში საწევრო გადასახადის გადაუხდელობა წევრობის შეწყვეტის საფუძველია.

• ბიომეურნეობა/ბიოწარმოება;
• ბიომარკეტინგი;
• ბიოსერტიფიცირება;
• გეოგრაფიული აღნიშვნები და ადგილწარმოშობის დასახელებები;
• სურსათის უვნებლობა;
• ჯგუფური სერტიფიცირება;
• აგროტურიზმი;
• ბიო საშუალებების (სასუქები, პრეპარატები), ბიოთესლისა და ბიონერგის მოძიება.

„ელკანას“ საკონსერვაციო საქმიანობის ფარგლებში გამრავლებული სასოფლო-სამეურნეო კულტურებისა და შინაური ცხოველების ძველი ქართული ენდემური სახეობებისა და ადგილობრივი/აბორიგენული ჯიშების:

• სათესლე მასალის გარკვეული რაოდენობის უფასოდ გადაცემა, მოსავლის აღების შემდეგ ორმაგი ოდენობის დაბრუნების პირობით;
• სანაშენე ცხოველებისა და სანერგე მასალის გარკვეული რაოდენობის შესყიდვა შეღავათიანი პირობებით.

წევრისათვის საწევრო მომსახურების გაწევაზე პასუხისმგებელი პირველადი საკონტაქტო პირია მისი ძირითადი მრჩეველი, რომელსაც წევრი ირჩევს გაწევრიანების განაცხადში, მისი წინასწარი თანხმობის საფუძველზე. 

წევრობის სტატუსთან, საწევრო გადასახადთან და სხვა ადმინისტრაციულ საკითხებთან დაკავშირებით შეგიძლიათ ასევე მიმართოთ ასოციაციის ადმინისტრაციას.

ამასთან, წევრობასთან დაკავშირებით მიღებული ნებისმიერი გადაწყვეტილება და/ან ქმედება შეიძლება გასაჩივრდეს ასოციაციის გამგეობაში ან უკუკავშირის ფორმით ეცნობოს ასოციაციის მენეჯმენტს.

ასოციაციის სახელზე შეტყობინების გაგზავნად ითვლება წევრის ან მისი ძირითადი (პასუხისმგებელი) მრჩევლის მიერ მისამართზე administration@elkana.org.ge ელექტრონული შეტყობინების გამოგზავნა წევრობასთან ან/და საკონტაქტო ინფორმაციის ცვლილებასთან დაკავშირებულ საკითხებზე.